A組形勢分析

11月16日

東道主卡塔爾首次以主辦國身份參加世界盃決賽週,揭幕戰如果能夠喺厄瓜多爾身上全取3分嘅話,就好大機會避免繼2010年南非世界盃後,成為第二支分組賽出局嘅主辦國球隊。呢支應屆亞洲盃冠軍有一定機會喺A組拎到次名出線資格。

荷蘭喺A組絕對係一支獨秀,無論球員實力、教練領軍能力,以及經驗同往績都比其他三隊高。不過佢哋未能打入上屆俄羅斯世界盃決賽週,相信今屆誓要爭取好表現,拎到首名出線資格之外,更加希望可以打破世界盃三次亞軍的宿命,更上一層樓,取得世界盃冠軍。

A組次名出線資格將會由其餘三支球隊一齊競逐。備受爭議嘅厄瓜多爾喺世界盃外圍賽一共入咗27球,成為歷來球隊喺外圍賽入波最多一屆,球員更加年青當打,平均年齡只有25歲,為南美區最年青球隊。揭幕戰對卡塔爾將會決定球隊能否晉級淘汰賽。

雖然近年非洲球隊表現麻麻,只有加納 (2010年)、尼日尼亞 (2014年) 同阿爾及利亞 (2014年) 打入過十六強,不過小編認為應屆非洲國家盃冠軍塞內加爾將會取得次名出線資格之外,更加有機會繼2002年再一次打入8強。雖然沙迪奧文尼因傷未能出席今屆賽事,但係球隊陣中依然猛將如雲,伊斯美拿沙亞、基耶、古尼巴利同門將伊度亞文迪等主力球員都係效力緊歐洲勁旅。只要發揮正常,絕對有機會晉級16強。