B組形勢分析

11月16日

B組幾支球隊都相當熟路,而三支被人睇低一線嘅球隊將有望可以突圍而出。

英格蘭其實出線有一定暗湧。領隊修夫基雖然能夠帶領英格蘭晉身世界盃四強及歐國盃決賽,但係最近喺歐洲國家聯賽嘅表現就認真麻麻。佢哋將會面對英倫三島之一嘅威爾斯同美國,兩支球隊主力球員都效力緊英超同歐洲五大聯賽,有一定戰鬥力,睇嚟英格蘭要出線就要睇隊長哈利簡尼嘅表現。佢將會力爭連續兩屆成為賽事神射手同打破朗尼嘅紀錄,成為國家隊入波最多嘅球員。只要佢繼續「有貨交」,英格蘭將可以鎖定首名出線資格。

美國反而係英格蘭出線最大威脅嘅球隊。陣中多位球員年青當打,「美國隊長」佩利錫將會率領呢支年青球隊力爭次名出線資格,不過佢哋喺外圍賽方面表現平平,只係得到第三位,慶幸美職聯比歐洲賽事早最少一個星期完結,球員可以有更多時間備戰世界盃,所以大家絕對要留意呢支充滿體力球隊嘅表現。

威爾斯由於事隔64年,再度打入世界盃決賽週,所以經驗方面一定會有所不足。佢哋喺2016年歐國盃表現無畏無懼,加上當年更加力壓英格蘭取得分組首名出線資格,最終更加打入四強,令人津津樂道。不過佢哋外圍賽要踢到附加賽先至以1比0小勝烏克蘭晉身決賽周,實力好似不及之前,加上巴爾等幾位主力球員年紀漸大,今屆世界盃有可能未必能夠出線。

最後,相信大部份球迷都會預期伊朗會喺分組賽出局。往績亦都說明一切,佢哋五次殺入決賽週都未能晉級十六強淘汰賽,只係比蘇格蘭嘅8次分組賽出局少。不過陣中前鋒達美利絕對需要留意,呢位波圖正前鋒上季替球隊攻入20球,拎到葡超金靴獎。如果球隊唔想做「三零部隊」嘅話,佢嘅表現舉足輕重。