G組形勢分析

11月16日

五屆世界盃盟主巴西絕對係今屆卡塔爾世界盃頂頭大熱奪標球隊，佢哋Keep住每一屆賽事都能夠打入決賽週，不過球隊自2002年高舉大力神盃後再未奪冠。如果佢哋今屆賽事再一次失之交臂嘅話，將會苦等24年，要到下屆2026年世界盃先有機會爭標，成為自1958年首奪冠軍後再與冠軍無緣最長時間的隊伍。

不過巴西對上15場世界盃分組賽賽事保持不敗，睇嚟今屆賽事都好大機會可以晉級十六強。球隊前線進攻火力超級強勁，擁有尼馬、雲尼素斯、加比爾捷西斯、馬天尼利、拉芬拿、安東尼以及列查利臣等豪華攻擊陣容。不過後防仍然有38歲老將泰亞高施華同39歲丹尼爾艾維斯入選，睇嚟後防速度方面有一定弱點。但係相信巴西今屆賽事將會以攻待守，力爭首名資格出線。

同組瑞士估計將會同巴西攜手出線。事關佢哋對上4次世界盃決賽週都能夠晉級十六強，歐洲球隊方面亦只有法國同比利時做到呢個好成績。令人眼前一亮嘅係佢哋喺外圍賽力壓應屆歐洲國家盃冠軍意大利，取得首名直接晉身世界盃決賽週資格，導致意大利喺附加賽輸埋俾北馬其頓，緣盡征戰世界盃。瑞士陣中骨幹球員包括格列沙加、沙基利、列卡度洛迪古斯以及施法路域都係嚟自2009年U17世界盃冠軍成員，幾位球員都年過30，今屆賽事誓必搏盡，衝擊更好成績。

塞爾維亞自2006年成功殺入世界盃決賽週後，9場分組賽一共輸咗7場，係所有歐洲球隊成績最差嘅一隊，而三次世界盃決賽同樣未能晉級十六強。雖然球隊擁有米祖域同拉賀域兩位頂級前鋒坐鎮，但係睇嚟佢哋要力壓巴西同瑞士出線有一定難度。

喀麥隆近年世界盃決賽週表現同樣麻麻。進入今屆卡塔爾世界盃之前錄得連輸7場決賽週賽事劣績，只係比連輸9場嘅墨西哥好。球隊由名將桑治帶隊，足總主席伊度奧領軍，睇嚟目標係要取得比2014年世界盃分組賽以0分出局及只入1球嘅更好成績。