決賽、季軍戰形勢分析

12月16日

決賽：阿根廷 對 法國

阿根廷四強以3比0技術性擊敗克羅地亞，繼2014年之後再次晉身決賽。呢場比賽球王美斯表現技驚四座，第三球更加可以話摧毀咗今屆表現非常出色嘅克羅地亞球員法迪奧嘅足球生涯，喺右路連過佢兩次，落到底線仲可以精準地傳中助攻，為隊友艾華利斯取得入球。之前都已經講過，阿根廷全隊上下一心，誓要為美斯拎到世界盃冠軍寶座，所以今場比賽士氣方面將會十分高昂，加上現場大部份球員都撐阿根廷，相信美斯今次有機會舉起大力神盃。

法國四強以2比0擊敗摩洛哥，由於對方幾位防守主力球員受傷，法國喺早段已經先開紀錄，取得優勢。喺死守情況下，差啲俾摩洛哥追平，最後由於摩洛哥球員體力不繼，法國有啲運之下再入一球，拉開領先優勢，成功連續兩屆賽事晉級決賽。法國今屆賽事際遇相當唔錯，其實只係八強面對英格蘭陷於苦戰，但最終都成功過關，四強亦只係面對疲兵摩洛哥，所以今屆賽事好大機會成為第二支成功衛冕冠軍嘅球隊。雖然情感上好想球王美斯拎到世界盃冠軍，但三線實力法國比阿根廷略勝一籌，所以預計「亞軍廷」將會再次得到亞軍，而法國將可憑整體實力獲勝，成功衛冕冠軍。

季軍戰：克羅地亞 對 摩洛哥

克羅地亞雖然喺四強賽事以0比3不敵阿根廷，但係今屆賽事整體表現相當好，隊長摩迪嘅表現更加令人佩服到五體投地。格仔兵團計埋上屆世界盃十六強、八強、四強同今屆賽事十六強同八強都要進行加時賽，足足打多150分鐘賽事嘅時間。而摩迪同佩利錫等幾位老將絕無欺場，交出頂級表現，奈何球隊前線進攻火力的確麻麻，除咗對加拿大一戰中攻入4球外，其他5場比賽只係一共攻入兩球，今場波對住防守力十分好嘅摩洛哥，睇嚟未必有甜頭。

摩洛哥四強同樣以0比2被法國擊敗，但係其實能夠晉身四強經已令人喜出望外。當一對正選中堅受傷嘅時候，後備入替嘅球員明顯級數有所不及，而中前場幾位球員包括保法，體力亦唔能夠應付全場比賽，上場對法國就係一個好例子，當保法下半場中段被換出後，球隊攻力銳減。不過睇返球隊晉級過程6場比賽亦只係一共攻入5球，仲要比克羅地亞少入一球。所以今場季軍戰兩隊雖然輕裝上陣，但由於雙方攻力麻麻，睇嚟今場賽事或會以較細比數打成平手，要互射十二碼先分到勝負。