8強形勢分析

12月08日

經過連續四日扣人心弦嘅十六強賽事之後，世界盃八強位置已經塵埃落定。嚟到呢個階段，只有真正嘅強隊先有得留低，究竟邊四支球隊可以更進一步殺入四強呢？立即同大家檢閱一下四場八強賽事。

克羅地亞 對 巴西

克羅地亞十六強同日本踢足120分鐘只能夠以1比1打成平手，最終憑互射十二碼勝出賽事晉級八強。相反巴西十六強以4比1輕取韓國，下半場更加可以作出一定程度嘅輪換，就連三號門將都有份落場。單睇體能狀況同晉級過程，巴西都有絕對優勢。

不過克羅地亞始終係上屆世界盃亞軍，大賽經驗足夠，雖然陣中多位主力球員年過三十，但係仍然有一定嘅戰鬥力。37歲嘅摩迪繼續成為球隊進攻核心人物，而33歲嘅佩利錫寶刀未老，又入波又助攻。

巴西十六強上半場就已經以4比0遙遙領先韓國，球員教練更加跳足四次森巴舞。由於佢哋唔使踢加時賽，體能方面將會有優勢，加上前線速度非常高，相信將會令一眾克羅地亞守衛疲於奔命，預計巴西今仗可以輕取克羅地亞晉級四強。

荷蘭 對 阿根廷

今場波絕對係一場五五波！荷蘭有戰術大師雲高爾帶隊，會作出針對性部署。阿根廷踢法可能冇咁有紀律性，但係全隊上下都會為美斯作出貢獻，而美斯個人今屆賽事亦都狀態大勇，所以今場比賽真係有機會踢成均勢。

荷蘭十六強以3比1擊敗美國，雖然曾經一度被美國追近比數，但係整體實力同把握力都比較好，加上一對左右翼衛表現出色，既有入波亦有助攻。前鋒迪比亦越踢越好，加保亦有時參與組織攻勢，後防亦有雲迪克，三線實力平均。

阿根廷方面踢法比較簡單，就係「眾志成城為美斯」。每一位球員都甘心為呢位一代阿根廷球王賣命，加上上年已經拎到美洲國家盃冠軍，令到美斯有啲如釋重負嘅感覺，今屆世界盃更加享受賽事，上場第1000場職業比賽更為球隊先開紀錄一球，中前場上腳嘅時候更加無人能阻。預計今場比賽萬眾一心嘅阿根廷將可險勝荷蘭晉級四強。

摩洛哥 對 葡萄牙

摩洛哥正如賽前預測一樣以黑馬身份擊敗西班牙，晉級八強。不過摩洛哥呢場十六強賽事雖然最終憑住互射十二碼晉級，但係陣中有好幾位主力球員因傷提早離場，今場比賽未必趕及傷癒，又或者未能以全力狀態迎戰葡萄牙。

葡萄牙十六強以6比1大炒瑞士晉級。呢場比賽瑞士因為右閘域馬受傷而改踢三中堅陣式，結果球員好似未能適應，繼而兵敗如山倒。C朗拿度呢場賽事亦都係佢多年以嚟首次先列後備嘅國際賽賽事，而取代佢嘅正前鋒位置嘅干沙路拉莫斯更加大演帽子戲法。相信今場比賽主教練山度士會繼續維持勝利十一人正選陣容，面對黑馬摩洛哥嘅挑戰。

其實如果摩洛哥把握力好啲嘅話，理應可以喺法定時間內解決西班牙。不過球隊後備球員實力睇嚟同正選有一定差距，加上球員出現傷疲嘅情況，預計今場賽事葡萄牙可順利擊敗對手，晉級四強。

英格蘭 對 法國

絕對係八強最備受注目嘅對賽！港人至愛嘅英格蘭將會硬撼衛冕冠軍法國。

英格蘭十六強以3比0輕取塞內加爾晉級。睇返今屆賽事英格蘭整體表現都算有說服力，雖然對美國一仗表現麻麻，但係球隊前中後實力強勁，就算換入後備亦都唔會減低實力，踢法亦都相當靈活，既可以踢三中堅陣式，有時睇情況亦會踢返四後衛陣式。就連正前鋒哈利簡尼上場都開埋齋，英格蘭真係真係有機會再進一步。

法國十六強同樣以3比1輕鬆擊敗波蘭，不過佢哋4場賽事都有失球，加上門將羅利斯表現時好時壞，後場表現令人有啲擔心。不過球隊陣中有無人能阻嘅安巴比坐鎮！佢今屆賽事經已入咗3球，速度力量異於常人，今場面對卡爾獲加將會有好戲睇。另外基斯文表現出色，唔介意做多啲防務工作，再以長傳將皮球傳到前線幾位快馬隊友腳下爭取入球。

今場比賽賽果難以預測，勝負關鍵將會係邊隊會自己犯錯，所以雙方有機會法定時間踢成平手，互射十二碼英格蘭晉級。