16強前半形勢分析

12月03日

A至H組經過三輪分組賽之後，十六強隨之誕生。有人歡喜有人愁，比利時、德國同烏拉圭等傳統勁旅紛紛大熱倒灶出局，相反亞洲幾支球隊日本、韓國同澳洲都能夠晉級淘汰賽。呢個時候立即同大家前瞻一下十六強賽果。

荷蘭 對 美國

雲高爾帶領嘅荷蘭今屆賽事表現中規中矩，雖然取得A組首名資格出線，但係主要原因係同組對手實力唔算好強。球隊入球能力認真麻麻，相當依賴今屆賽事三場分組賽都有入波嘅加保。而迪比狀態一般亦令球隊攻勢單調，更加被人話悶波。

對手美國以B組次名資格出線，三場分組賽只入兩球，攻力亦有一定問題，不過球隊防守非常好，目前為止只係失過一個十二碼罰球。陣中多位年青球員睇嚟將會以今屆賽事為踏腳石，好好裝備自己，務求喺下屆美國、加拿大同墨西哥合辦嘅世界盃取得更好成績。

今場賽事由於兩隊進攻力未算突出，加上美國防守力相當好，入球未必會多，兩軍更加有可能悶和，進入加時賽，最終經驗較佳嘅荷蘭主教練雲高爾將可帶領球隊晉級八強。

阿根廷 對 澳洲

阿根廷首輪分組賽爆冷，被沙特阿拉伯擊敗之後，第二場分組賽上半場對墨西哥其實都表現麻麻，不過好彩球王美斯下半場一個救全家，成功為球隊打破悶局，繼而擊敗墨西哥。之後對波蘭嘅比賽更加越踢越上力，最終首名出線。加上主教練史卡朗尼應該已經搵到最佳正選十一人，效力曼城嘅艾華利斯表現搶鏡，今場賽事應該會正選上陣，繼續喺前場分擔美斯嘅入球重任。

澳洲今屆賽事雖然首輪分組賽大敗畀法國，但之後兩場分組賽竟然可以連勝兩場，拎到6分，以次名出線。不過球隊整體表現其實唔算十分好，兩場勝仗亦都只係小勝對手1比0，最後一輪分組賽面對丹麥時對手竟然多次作出傳中球，俾澳洲中堅舒達頂走晒。相信澳洲今場對住以地面進攻為主嘅阿根廷，將會陷於苦戰。預計最終阿根廷可輕取澳洲晉級。

法國 對 波蘭

法國頭兩輪分組賽全勝，篤定出線之後，第三輪分組賽作出大幅度輪換，導致球隊輸波而回。不過咁樣做反而令到一班主力球員得到休息，對於球隊衝擊冠軍有好大幫助。不過同時亦都睇到法國後備力量不足，如果主力球員受傷嘅話，未必可以走得好遠。

波蘭最後一輪分組賽全靠墨西哥未能夠以大比數擊敗沙特阿拉伯，先至能夠輸波晉級十六強，相當夠運。前線入球重責繼續落咗喺利雲度夫斯基身上。雖然佢今屆賽事經已開齋，但亦曾經射失一球十二碼。不過波蘭其他球員質素認真麻麻，睇嚟今場面對主力球員悉數上陣嘅法國，都係九死一生，出局收場。

英格蘭 對 塞內加爾

英格蘭首輪分組賽大勝伊朗後，面對美國時表現差勁，差啲輸埋波，不過佢哋喺第三輪分組賽對住主力球員衰老嘅威爾斯時踢出身價，技術性擊敗對手，以小組首名晉級。球隊每一個位置都可以作出輪換而唔影響球隊整體實力，既可以踢四後衛陣式，亦都可以踢三中堅陣式，靈活多變，球員狀態唔錯，睇嚟今屆賽事好大機會可以行得好遠。

塞內加爾賽前宣佈沙迪奧文尼因傷缺席今屆賽事，大大影響球隊實力。首輪分組賽先輸一場，後來連贏兩場，總算取得次名資格出線。不過今場賽事中場基耶將會停賽，中前場亦缺乏一位重心球員坐鎮，加上三場分組賽都有失球，所以今場面對如日方中嘅英格蘭應該會行人止步，無緣晉級。