16強後半形勢分析

12月03日

日本 對 克羅地亞

日本今屆賽事展現出球隊驚人的反勝能力，成功兩次喺落後嘅情況下反勝兩支歐洲傳統勁旅德國同西班牙，仲要拎埋被喻為死亡E組嘅首名出線資格，今場將會硬撼上屆世界盃亞軍克羅地亞。

相信日本主教練森保一今仗都會繼續先守住上半場，下半場先換入三笘勳同堂安律等攻擊球員加強攻力，嘗試取得入球。不過大前題係要先守和對手，呢方面我就對日本嘅防線表現好有保留啦，三場分組賽都有失球，後防失誤亦都較多。今場對住經驗豐富嘅克羅地亞未必可以一而再，再而三用返呢招。

克羅地亞今屆賽事三場分組賽有兩場悶和對手，只係對加拿大一仗失咗一球。就算佢哋畀加拿大先開紀錄，但係成隊波都處變不驚，繼續製造攻勢，結果反勝對手4比1。睇嚟日本唔可以第三次上演絕地反擊戰，預計克羅地亞將可贏波晉級。

巴西 對 韓國

巴西喺篤定出線嘅情況下，喺第三輪分組賽作出大幅度換人，雖然輸咗俾喀麥隆，但係大部份主力球員得到充分休息時間，如果尼馬趕及傷癒復出嘅話，今場波將會以強陣迎戰韓國。

巴西頭兩場分組賽成功淨勝對手，全取6分。不過當面對對方死守嘅時候，就顯得有啲老鼠拉龜嘅感覺，攻極都攻唔入。不過今屆賽事連防守中場卡斯美路都能夠後上入波，睇嚟巴西今屆賽事三線實力都相當強，絕對有能力行到去決賽階段。

至於韓國能夠戲劇性殺入十六強，已經係超額完成。佢哋喺幾經辛苦嘅情況下，面對半力出擊嘅葡萄牙，亦要鬥到比賽末段，先至憑孫興慜嘅直線傳送俾黃喜燦，攻入反勝一球，先能夠全取3分，再以較佳得失球力壓烏拉圭晉級。過程其實都幾勉強同夠運，相信去到淘汰賽階段未必可以再咁好運，球隊實力將會決定勝局，所以預計巴西將可贏波晉級八強。

摩洛哥 對 西班牙

賽前俾人睇低一線嘅摩洛哥，已經用實力證明佢哋係其中一支黑馬球隊。睇返佢哋晉級過程，其實充滿說服力。雖然首輪分組賽只係同克羅地亞打成平手，但係第二、三輪分組賽連勝兩場，當中更加技術性擊敗比利時，表現令人眼前一亮。

球隊實力相當唔錯，三線都有好波之人坐鎮，後防有前狼隊中堅沙爾斯，中場有效力費倫天拿嘅安拉拔，前線就有效力西維爾嘅安拿斯利，而球隊右路更加係今屆賽事其中一個最強組合，分別有車路士翼鋒施耶殊同巴黎聖日耳門嘅右閘夏基美。

對手西班牙雖然先聲奪人，首輪分組賽以7比0大炒哥斯達黎加，但係其後兩場分組賽只係得1和1負劣績，兩場賽事都係喺領先嘅情況下被追和同被對方反勝，睇嚟球隊領先對手後，出現不思進取嘅打法，不斷差傳並無認真去入多一球，如果再唔作出改善嘅話，嚟到淘汰賽將會再一次受到懲罰。中場巴斯基斯去到比賽後段亦都有啲轉數慢咗，門將施蒙用波能力麻麻，亦造成隱憂。睇嚟今場對住體能相當好兼有技術嘅摩洛哥，未必可以贏波，預計最後兩隊喺法定時間打成平手，互射十二碼，西班牙晉級。

葡萄牙 對 瑞士

葡萄牙頭兩輪分組賽連勝後，已經鎖定出線資格，所以第三輪分組賽亦都俾一眾主力球員同有黃牌在身嘅球員休息，養精蓄銳迎接十六強賽事。C朗拿度表現繼續低迷，好彩一班隊友表現醒神，當中般奴費南迪斯更獨建兩功並交出兩個助攻，大放異彩。另外中場隊友賓拿度施華同尼維斯表現對辦，加上後防亦有賀賓迪亞斯同達洛治喺度，所以逐個位置球員比較，葡萄牙技高一籌。

瑞士頭兩場分組賽以守待攻，分別贏喀麥隆1比0同輸畀巴西0比1，去到第三輪分組賽面對塞爾維亞攻入3球，最後以3比2險勝對手，總算拎到6分，以次名晉級十六強。不過球隊正選十一人幾乎踢足三場分組賽，體力方面應該會出現問題，加上門神桑馬有傷，唔知趕唔趕得切復出，睇嚟今場面對抖足嘅葡萄牙未必可以更進一步，預計葡萄牙晉級八強。