C組形勢分析

11月16日

小編認為今屆賽事阿根廷誓要一洗「亞軍廷」嘅污名，雖然陣中球員並非星光熠熠，但係論團結程度絕對係有史以來最團結一屆，眾志成城為美斯拎到今屆世界盃冠軍。

事實上阿根廷喺教頭史卡朗尼帶領下，已經錄得35場賽事不敗嘅驕人成績，由於今屆賽事將會係美斯最後一屆出席世界盃，所以佢亦都會歇盡所能，協助球隊更進一步拎埋冠軍。

C組次名出線資格將會由波蘭同墨西哥一齊競逐。波蘭繼續有世界級前鋒利雲度夫斯基坐鎮，佢外圍賽個人入咗13球波，當中包括附加賽一球十二碼，帶領球隊擊敗瑞典，取得決賽週資格，而球隊外圍賽入波數字只係比英格蘭、德國同荷蘭少，攻力有一定保證。

而墨西哥對上8次，躋身決賽週都能夠晉級淘汰賽，不過陣中嘅奧祖亞、古亞達度等幾位主力球員年紀偏高，而家要三日踢一場賽事有啲吃力，不過球隊以地波小組踢法為主，頗為悅目，小編認為佢哋將可以力壓波蘭，取得次名出線資格。

至於有半個主場之利嘅沙特阿拉伯，論往績真係不堪入目，對上16場世界盃決賽週賽事只係贏過3場，睇嚟今屆賽事將會再一次喺分組賽出局。