D組形勢分析

11月16日

法國有機會繼1962年巴西後，成為另一支成功衛冕冠軍嘅球隊，不過同一時間亦有人抱住唔同嘅意見。事關對上三支衛冕冠軍都喺分組賽出局。雖然法國自1998年以來三次殺入決賽，但係佢哋喺2002年以衛冕冠軍身份分組賽出局，一個入球都入唔到。

陣中兩位超主力球員兼上屆冠軍功臣簡迪同普巴都因傷將會缺席今屆賽事，球隊中場中路位置睇嚟要睇皇家馬德里新星祖亞文尼同卡馬雲卡嘅表現，而祖雲達斯嘅拉比奧特最近喺意甲亦有好表現，再加上進攻能力太強，安巴比基本上無人能阻，聯同應屆金球獎得主賓施馬同基士文，法國應該可以穩奪小組首名出線資格。

同組另一支歐洲勁旅丹麥亦不容忽視。佢哋最近曾經以2比0完勝法國，10場外圍賽錄得9場勝仗，當中有8場更加保持無失波，防守力比所有歐洲球隊好，佢哋上屆歐洲國家盃更加喺經歷艾歷臣事件後，都能夠打入四強，球員上下一心，睇嚟分組次席位置無走雞，如果對法國一戰交出超水準表現，更加有可能反壓法國，取得首名出線資格。

至於嚟自非洲嘅突尼西亞對上6次打入決賽週都喺分組賽出局，輸波百分比高達60%。不過佢哋外圍賽8場賽事中，只係一共失咗3球，一場賽事最多只係失1球，防守力有一定保證。而比突尼西亞嘅世界盃決賽週輸波百分比高嘅，有同組嘅澳洲。澳洲今屆賽事人腳方面認真麻麻，最令人有所期待嘅係前英超兵穆爾同效力緊意甲維羅納嘅侯斯迪，睇嚟袋鼠兵今屆賽事都會再一次喺分組賽出局。