E組形勢分析

11月16日

德國在二千年代曾經雄霸世界盃，在幾屆賽事中都能夠躋身四強。令人驚訝嘅係，德國竟然喺上屆俄羅斯世界盃失利，未能晉級下一圈賽事。

德國以行動回應一切，外圍賽方面10場賽事，一共取得9場勝仗，更加成為第一隊宣佈取得世界盃決賽週席位球隊。雖然前線方面有添姆雲拿因傷將會缺席今屆賽事，但係夏維斯、甘美治、基拿比同利萊桑尼正處於最當打狀態，加上門將紐亞、湯馬士梅拿同伊基根度簡幾位老將依然在陣，相信今屆賽事球隊將會以老帶新，繼續有好表現，不過能否拎到首名出線，就要問過西班牙。

西班牙喺上屆俄羅斯世界盃，同樣出現咗內部問題，球隊主教練盧柏迪利喺開賽前一日宣佈辭職，好彩安歷基走馬上任，總算成功帶隊晉級十六強，而佢之後亦成功帶領球隊踢出昔日足球王者風格。佢哋喺外圍賽平均控球百分比高達76%，而被對方攻門次數更加係錄得最少嘅38次。陣容方面安歷基引入柏迪、加維、費蘭托利斯同艾力加西亞幾位年青球員，大大增強球隊活力，相信球隊今年世界盃誓要再下一城，爭取更佳成績，將會同德國爭奪首名出線資格。

同組嘅日本係最有可能挑戰到兩支歐洲傳統勁旅嘅出線位置，究竟球隊可唔可以首次連續兩屆賽事都殺入十六強階段？26名大軍入選球員大部份喺歐洲聯賽征戰，所以首戰對德國將會成為出線關鍵，由於陣中多位球員效力德甲，喺熟對方球員路數嘅情況下，或者可以拎到分數，假如對哥斯達黎加全取3分嘅話，將會出現爆冷。

同日本嘅情況差唔多，哥斯達黎加首戰西班牙，將會成為球隊可唔可以晉級淘汰賽關鍵。奈何球隊實力未能重返2014年爆冷打入八強水平，加上對上世界盃決賽週6場賽事未嘗一勝，所以難以寄望佢哋今屆可以交出好成績。好彩陣中擁有世界級鋼門基羅拿華斯坐鎮，再加上2014年八強主力球員波基斯、拜仁雷斯同祖爾金寶依然在陣，球隊將有一定嘅戰鬥力。