F組形勢分析

11月16日

比利時黃金一代成功帶領球隊喺近屆世界盃交出好表現，佢哋喺近兩屆世界盃三隊成功打入八強嘅球隊之一。但係陣中幾位最出色嘅球員包括夏沙特、艾達維特、華湯根、域素、美頓斯都出現狀態下滑同年紀漸大嘅問題。睇嚟球隊嘅希望將會放喺迪布尼同盧卡古嘅身上，後者更加自2014年世界盃同歐國盃一共攻入11球，歐洲球員方面只係比C朗拿度少兩球，不過呢位國際米蘭前鋒最近先至傷癒復出，狀態有待提升。不過由於球隊實力同經驗十足，首名出線應該十拿九穩。

上屆俄羅斯世界盃亞軍克羅地亞希望可以衝擊小組首名出線資格，不過佢哋世界盃決賽周表現頗為不穩。對上五次殺入決賽週，曾經三次分組賽出局，但又成功兩次殺入四強。陣中老將摩迪雖然年屆37歲，但寶刀未老，球會方面上季更加帶領皇家馬德里拎到聯賽同歐聯冠軍。另一老將佩利錫亦喺熱刺繼續有好表現，論經驗同心理質素，克羅地亞絕對有能力拎到次名出線資格。

加拿大絕對係今屆賽事其中一隊比較少人熟悉嘅球隊。自1986年以嚟再次殺入世界盃決賽週，真係比較難估計佢哋今屆賽事會有咩表現。但係佢哋喺外圍賽表現出色，力壓美國、墨西哥取得中北美洲及加勒比海第三圈首名出線資格，23個入球同只失7球更加冠絕整個第三圈賽事。今屆賽事相信會係陣中主力阿方素戴維斯成為世界級球星嘅大舞台，大家要拭目以待。

摩洛哥今屆第二次連續兩屆都能夠躋身決賽週。如果佢哋希望可以重拾1986年佳績嘅話，佢哋就要改善比賽末段嘅表現，事關佢哋4年前俄羅斯世界盃4個失球中，有兩球喺90分鐘後失嘅。而摩洛哥足總方面亦都某程度因為希望施耶殊入選國家隊，而辭退前主教練夏利賀錫，令到呢位車路士球星可以再入隊，帶領球隊出戰今屆世界盃賽事，佢將會夥拍夏基美同安拿斯利攻堅，不過要出線將會有好大難度。