H組形勢分析

11月16日

葡萄牙雖然一直盛產好波之人，但係佢哋對上14場世界盃決賽週賽事只係贏過3場，表現令人失望。教練費蘭度山度士希望基斯坦奴朗拿度可以喺世界盃前重拾水準表現。同美斯一樣，C朗拿度都從未喺世界盃決賽週淘汰賽圈取得入球，相信佢今屆賽事誓要打破呢個宿命。不過，如果C朗今屆賽事取得入球嘅話，將會成為首位五屆賽事都有入球嘅球員。

葡萄牙2018年歐洲國家盃冠軍決賽，當晚C朗拿度因傷提早離場，隊友眾志成城，為球隊勇奪冠軍。今屆前中後三線陣容相當完整，中場有般奴費南迪斯、班拿度施華、後防有魯賓迪亞斯同簡些路坐鎮，相信只要正常發揮，將可取得出線資格。至於可唔可以拎到首名資格，就要睇同組其他對手嘅表現。

同組南美球隊烏拉圭近8場世界盃決賽同賽事錄得6勝，而對上7次打入決賽週有5次能夠晉級十六強。雖然前線仲要依靠老將卡雲尼同蘇亞雷斯攻堅，以及後場仲係由高甸同卡沙利斯鎮守後防，但係中場方面今屆將會出現費達歷高華維迪呢位天之驕子。佢呢兩季喺皇家馬德里表現越嚟越好，睇嚟佢將會有機會成為今屆賽事其中一位最耀眼新星。雖然前後場幾位主力球員年過35歲，但係烏拉圭決賽週表現穩定，小編睇好佢哋有機會同葡萄牙一齊出線。

非洲球隊加納喺2010年就係俾蘇亞雷斯一下手球阻止咗佢哋入波，結果十二碼宴客，而最終互射十二碼飲恨輸咗俾烏拉圭，八強被淘汰出局。加納今屆賽事能否一雪前恥，就真係要睇當日比賽臨時發揮。球隊賽前傳出好多問題，加上陣中幾位主力球員仲係阿耶兩兄弟。最近幾場友賽表現麻麻，睇嚟佢哋喺呢組有機會包尾出局。

因為韓國今季陣中擁有應屆英超神射手孫興慜坐鎮，雖然佢較早前代表熱刺踢歐聯，因面部受傷而接受手術，但係不幸中之大幸佢能夠抖足精神，參加今屆世界盃。不過佢哋除咗2002年日韓世界盃成功打入四強外，喺27場世界盃賽事只係贏過3場，成績慘淡。但係佢哋4年前就成功擊敗德國，送對手一程，令德國分組賽出局。今屆賽事陣中仲有喺拿玻里表現好好嘅中堅金玟哉，前場亦有金信煜同黄喜燦等進攻好手爭取入波。相信韓國隊將可以喺呢一組製造亂局。