4強形勢分析

12月12日

阿根廷 對 克羅地亞

阿根廷同荷蘭上演咗今屆最激烈嘅八強大戰，雙方喺法定時間打成2比2平手，最後要以互射十二碼先分到勝負。比賽火藥味濃，出示黃牌次數更加追平咗世界盃紀錄，球證執法水平亦成為焦點。

美斯再一次盡顯球王風範，一個助攻加一個入球包辦球隊兩次得分。今場面對克羅地亞嚴密防守，未必會好似對荷蘭一仗中發揮得咁好。而擔任美斯保鑣角色嘅迪保羅同前鋒艾華利斯上場賽事太早被換出，導致被荷蘭追平。不過阿根廷球員身材較矮，克羅地亞有機會好似荷蘭踢得直接啲，放高波入禁區爭取入球。

克羅地亞再一次展示出球隊嘅韌力，喺落後嘅情況下追平巴西，以互射十二碼成功晉級。連續兩屆賽事嘅十六強同八強都要踢足120分鐘，再以互射十二碼分出勝負。不過由於克羅地亞已經連續兩場賽事需要踢加時賽，加上球員平均年齡亦較大，預計眾志成城嘅阿根廷將可殺入決賽，為美斯製造奪冠機會。

法國 對 摩洛哥

英格蘭對法國嘅八強大戰可以話係今屆世界盃其中一場最高水平嘅賽事。雖然英格蘭發揮理想，但係小編認為整體法國做得更加好。佢哋成功凍結比寧咸、懷斯同霍頓，令到英格蘭未能控制中場中路位置，只能依靠右路嘅薩卡同哈利簡尼製造機會。相反英格蘭放生基斯文，俾佢一次又一次助攻，更加走甩銀河唯一基奧特，令佢頂入致勝入球。法國晉級實至名歸。

摩洛哥繼續展開佢哋神奇之旅，成功擊敗葡萄牙，成為首支打入四強嘅非洲球隊。球隊防守非常有紀律，中場中路嘅「光頭佬」安拉拔不停走動作出防守，後防線亦保持高度集中，門將邦奴亦多次神救。不過由於一對正選中堅同左閘都先後因傷而缺陣或提早離場，右翼施耶殊、左翼保法同前鋒安拿斯利亦踢唔足全場，後備中鋒舒迪拿亦領紅導致今仗要停賽，預計法國今仗將可險勝摩洛哥，連續兩屆賽事晉級決賽。